Gipuzkoa berria, aire garbiarekin

5 06 2012

Gipuzkoako Foru Aldundiak gaur aurkeztu duen hondakinen kudeaketarako plan berriak kolore berdea du.
Esperantzaren kolorea. Lurrarena. Ardurarena. Etorkizunarena.
Errauste plantaren keak eta dioxinek zuten kolore grisaren beste muturrean dago.

Aire garbiak bira gaitzan ezinbestekoa zen hausnarketaren ondorioz dator proposamena, nazioarteko adituen eskutik.

Zorionak negozio ilunei aurre eginez alternatibak eta irtenbideak badaudela erakusteagatik.
Orain denon ordua da. Etxez etxe, auzoz auzo, herriz herri, animo eta aurrera!

Hau da Gipuzkoako Foru Aldundiak hondakinen kudeaketari buruz gaur aurkeztu duen plan berria: dokumentua osorik PDFan hemen edo argazkiaren gainean klik eginda jaitsi daiteke.

Advertisements




Urtetako zabortegiak itxiera data du, azkenean

3 06 2012

Nahikoa izan da Bilduk Gipuzkoako Foru Aldundia eta Zarauzko Udala kudeatzea, beste batzuek urte askoan hitz emandakoa legealdi bakar batean diseinatzeko eta gauzatzeko: Urtetako zabortegia eta Gipuzkoako gainerako biak (Lapatx eta Sasieta) beranduenera 2014ko abenduaren amaierarako itxiko dira, gaur Gara eta Berria egunkariek aurreratu dutenez.

Hemen irakur daiteke albistea:
· Los tres vertederos de Gipuzkoa cerrarán antes de acabar el año 2014 (Gara, 2012-06-03).
· Gipuzkoako zabortegiak 2014. urte amaierarako itxiko dituzte (Berria, 2012-06-03).

Gipuzkoako hondakinen plan berria asteartean aurkeztuko du Foru Aldundiak, eta plan horren baitan ez da aurreikusten ez zabortegirik ez errauste plantarik, Europak azken asteotan hondakinen kudeaketari buruz proposatutako neurrien ildotik. Hondakinen kudeaketan adituak diren nazioarteko bost lagunek idatzi dute Foru Aldundiak etzi aurkeztuko duen plan berria.

Nabarmentzekoa da, zabortegiak desagerrarazteaz eta errauste planta ez eraikitzeaz gain, hondakin guztiak tratatzea aurreikusten duela planak. Bereizi gabe botatzen dena ere planta zehatzetara bideratuko baita, horietan bereizteko eta dagokion berziklatze edo konpostatze planta berrietara eramateko.

Errauste plantarekin negozioa egin nahi zutenentzat kolpe gogorra da albistea, baina ezin ederragoa ingurune eta belaunaldi osasuntsuak aldarrikatzen ditugunontzat. Behin eta berriro esan du Bilduk: azpiegitura erraldoiak eta batzuen negozioa baztertu, eta herritarrak bihurtuko ditu politikaren ardatz. Herritarron ordua da. Arduraz jokatzea dagokigu. Ondo egitera goazela esan dugu orain arte, baina ondo ez, oso ondo egitera goaz! Animo denoi!

[ Portzierto, mundiala da: Gipuzkoako hiru zabortegiak itxiko dituzte 2014a amaitzerako, eta El Diario Vasco irakurtzen dutenek arrastorik ez! Honi esaten zaio “komunikabide unionista eta klientelarren hegemonia haustea” ].


Gai honekin lotutako albisteak:

· Urtetako gezurra, urteetako gezurrak (Ekai Txapartegi, ubel.wordpress.com).
· Gezurrak hanka motza duenean.





Etorkizuna erraustuz

18 03 2012

Errauste plantek osasunean duten eragina eta, batez ere, errauste planten atzean dauden interes ekonomiko zikinak agerian uzten dituen dokumentala da honakoa. 3 Mugak Batera plataformak aurkeztu zuen iaz, eta dagoeneko sarean ikusgai dago. Hondakinen bilketaren inguruan zenbait alderdi egiten ari diren demagogia merkearen sasoian, herriz herri zabaldu eta erakutsi beharko litzatekeen dokumentala da.

· Sinopsia: Olaztiko Cementos Portland Valderribas enpresak hondakinak erraustu nahi ditu, eta horrek alarmak piztu ditu Sakana, Goierri, Ameskoa, Lizarraldea eta Arabako Lautadan. Hainbat adituri egindako elkarrizketen bidez, dokumental honetan aktibitate honek pertsonen osasunarengan eta ingurunean duen eragina azaltzen da eta negozio zikin honen barnean murgiltzen da.

· Iraupena: 47 minutu.
· Iturria: hitzondobideoak

Incinerando el futuro from hitzondobideoak on Vimeo.





Osasuna atez ate, mesedez

25 10 2011

Zarauztarren udal ordezkariak ez gara aspertuko biharko osoko bilkuran. Ohiko gaiez gain, bi mozio aurkeztu dituzte oposizioko alderdiek.

ETAri deusezteko exijitzen dio PSE-EEren mozioak, Udalari erakunde armatuaren ibilbidea gaitzesteko eskatzearekin batera.

PNVk, berriz, Udal Gobernuari eskaera zehatza egiten dio hiri hondakinen kudeaketari buruzko beste mozio batekin:  Zarautzen atez ateko bilketa sistema ez dela abiaraziko adieraz dezan. Mozioak ez du galbiderik. Irakurri nahi duenak, hemen du, osorik.

Orain arte errauste plantaren proiektua, zabortegi prehistorikoak, inondik inora iraunkorra ez den eta erabat defizitarioa den gaur egungo bilketa sistema, eta abar luzea inposatu duten horiek, orain, kezkatuta daude gure herriak edonorentzat eredugarri izatearekin. Antzuola marka guztiak hausten ari da Europan. Usurbil, Hernani edo Oiartzun ez dabiltza oso atzean. Eta orain arteko marka guztiak hausteak, herri horietan, badu izena: atez ate.

Hori da, gaur egun, zaborra ahalik eta gutxien sortzeko inguruan ezagutzen dugun hondakinen bilketa sistema eraginkorrena. Ez naiz sartuko oraingo sistemak sortzen duen zulo ekonomikoan, zabortegien inguruko arrasto ekologikoan, gehiago berziklatzeak udalari ekartzen dizkion diru sarreretan, atez atekoak sortzen dituen lanpostuetan eta antzeko argudioetan. Batean eta bestean gero eta gehiago diren zero zabor taldeak ederki ari dira kontzientziazio lan hori egiten. Beste batzuek interes zehatzengatik orain arte ezkutatu zigutena erakusten, argi eta garbi.

Gaur egungo bilketa sistema ez da iraunkorra, ez ekonomikoki, ez ekologikoki. Sortzen ditugun hondakinek irentsiko gaituzte laster, sistema errotik aldatu edo zaborra erraustu ezean. Bi aukera ditugu, beraz: sortzen ditugun hondakin guztiak  zabor bihurtu eta erraustu, edo hondakin horiek berziklatu, bildu, saldu, berriro erabili eta zaborrik ez sortzen ahalegindu. Ni bigarrenaren aldekoa naiz, eta atez ateko bilketa sistema da hori lortzeko orain arte ezagutzen dudan eraginkorrena. Besteak beste, inguruotako zero zabor taldeen lana kenduta, beste inork ez didalako serio gai honen inguruko daturik, informaziorik eta argibiderik eman.

Ingurumenean eta osasunean duen eraginagatik, gai hau serioegia da alderdi interesengatik eztabaida politikoan arma bezala erabiltzeko. Nahikoa da. Hiri hondakinen kudeaketak erantzukizuna eskatzen digu udal ordezkariei, eta ez nolanahikoa. Erantzukinez erantzun dezagun, argudio sendoekin, eta elkarrekin. Europan esan dezatela laster, badela herri bat Kantauri itsasoaren hegian, hiri hondakinen kudeaketan marka guztiak hausten dituena eta gainerakoentzat eredu dena.

Bihar ere aire garbia arnastu nahi dudanez, osasuna atez ate, mesedez.