Artatxiki kroketak, tomatearekin eta txukrutarekin

31 05 2017

Artatxikidun kroketak (tipularekin eta porruekin), arroz esnearekin + gari sarrazenoaren irinarekin eta lio haziekin rebozatuta, etxean egindako tomate saltsarekin, eta etxean egindako bi txukrutekin lagunduta (lonbarda azarena eta ohiko azarena). %100 glutenik gabe.


Argazkia: instagram.com/kalaportu [2017-05-30].

Millet croquettes (with onion and leeks), breaded with rice milk + buckwheat flour and flaxseeds, homemade tomato sauce, and two different homemade choukroutes (cabbage choukroute and red cabbage choukroute). %100 gluten free and vegan.

Osagaiak

Orea egiteko: artatxikia, tipula bat, bizpahiru porru txiki, eta arto irina.
Rebozatzeko: gari sarrazenoaren irina (nik etxean ehotzen dut) eta lio haziak + arroz esne apur bat (beste edozein esne ere izan daiteke).
Saltsarako: etxean egindako tomate saltsa.

Nola prestatu

Egosi artatxikia 12 minutu inguru. Neurria: artatxiki baso bat x 2 baso ur.
Artatxikia egosten ari den bitartean, zatitu eta potxatu tipula eta porruak.
Behin artatxikia egosi eta ia urik gabe geratzen denean, gehitu potxatutako tipula eta porruak, arroz esne apur bat, eta orea loditzeko bota arto irin apur bat. Joan eragiten, orea sendotu arte.

Utzi orea hozten pare bat orduz.

Hoztean, moztu kroketak egiteko moduko zatietan, eta irineztatu edo rebozatu.
Arrautza eta ohiko irina beharrean, arroz esnea eta gari sarrazenoa eta lio haziak erabiltzen ditut nik.
Frijitu kroketak, eta behin frijitu ondoren, gehitu tomate saltsa.

Niri txukrutarekin lagunduta jatea gustatzen zait. Ohiko azaren eta lonbarda azaren txukruta egin ohi dut etxean. Txukruta aza fermentatua da.
Hemen txukruta egiteko bideo-errezeta eta apunteak, Iruñeko Nishime Makrobiotika Eskolako lagunen webgunean.
Eta hemen elikagai fermentatuei eta hauen onurei buruzko esteka bat: Alimentos fermentados y flora intestinal.

Dena dela, etxean txukruta eskura izan ezean, entsaladaren batekin edota nahi den osagarriarekin lagunduta ere jan daiteke, gustukoenaren arabera.

On egin!

Advertisements




Oshawa ogia

14 03 2017

Otsailean Iruñeko Nishime Makrobiotika Eskolak antolatu zuen makrobiotika ikastaroan jasotako eta etxean dagoeneko bizpahiru aldiz probatutako errezeta da honakoa. Erraza, gozoa, eta azukrerik eta irinik gabekoa. Bizio hutsa, egia esan.

OSHAWA OGIA (Nishime Makrobiotika Eskolaren errezeta)

Osagaiak

· Olo malutak, 3 edalontzi (glutenik gabeko oloa ere erabil daiteke).
· Sagar zukua, 3 edalontzi (sagarrak likuadora edo zuku-makinatik pasatuta lortzen den zukua erabiltzen dut nik).
· 5 sagar, birrinduta edo arraspatuta.
· Mahaspasak, edalontzi erdi bat-edo.
· Kanela hautsa (gustuaren arabera, nahi adina).
· Laranja edo limoi azala, arraspatuta (aukeran).

Nola prestatu

· Nahasi ontzi batean olo malutak, sagar zukua eta mahaspasak, eta utzi beratzen. Nishimeko lagunek bi orduz uzteko gomendatzen dute, baina 30 minutu inguru utzi ohi dut nik.
· Gehitu mahaspasak, kanela hautsa, laranja edo limoi azal arraspatua, eta birrindutako edo arraspatutako sagarrak, eta nahasi dena batera.
· Zabaldu guztia labeko bandeja edo erretilu batean, eta aldez aurretik 160 gradutan berotutako labera sartu, 60 minutuz.
· Ateratzean, utzi hozten, nahi bezala zatitu aurretik.
Gainaldea tostatu edo txigortu samarra geratzen da, baina barruko mamia samurra bezain gozoa.

Oshawa ogia izena duen arren, ogitik baino gehiago du opiletik emaitzak.
Behin moztuta, sagar tartaren antzeko zaporedun zati gozoak izango ditugu, batere irinik eta azukrerik gabe.

On egin!

Sarrera honi buruzko informazio osagarria:
· Jatorrizko errezeta, gazteleraz, Nishime Makrobiotika Eskolaren webgunean.

 

 

 





Olo gailetak (Nishime erara)

15 02 2017

Egunotan, Iruñeko Nishime Makrobiotika Eskolak antolatu duen makrobiotika ikastaroa ari naiz egiten. Doan eta on-line antolatu dute ikastaroa Nereak eta Almudenak, eta 1.900 lagun inguruk eman dute izena. E-posta bidez bidaltzen dituzte ikasgaiak, elikadura ohitura aldatzeko eta hobetzeko. Ikasgai bakoitzean gaiari buruzko bideo laburra eta gai horri buruzko apunteak PDFan bidaltzen dituzte. Opari eder bat, alegia.

Pasa den astean, hirugarren ikasgaian, azukrea erabat baztertzeko arrazoiekin batera, azukrea erabili gabe egin ditzakegun errezetak bidali zituzten. Horietako pare bat probatu ditut. Olo gailetak, esaterako, dagoeneko, hiru aldiz egin ditut, eta hain erraza denez, hemen doa errezeta:

OLO GAILETAK (Nishime erara)

photo-2017-02-08-20-25-24
[Nishimeko lagunen errezeta etxean lehen aldiz probatu, eta hau da emaitza:
azukrerik eta irinik gabeko olo gaileta gozoak].

Osagaiak:
· Olo malutak (bi edalontzi).
· Arroz esnea (edalontzi bat).
· Arroz melaza (bi goilarakada).
· Mahaspasak (edalontzi erdi bat).
· Kanela.

Jarri olo malutak eta mahaspasak beratzen, arroz esnearekin batera.
Maluten tamainaren arabera, esne apur bat gehiago edo gutxiago bota beharko dugu. Bustita geratu behar dute olo maluta guztiek, baina ez esnetan igeri.
Utzi beratzen ordubete inguru.
Ondoren, gehitu arroz melaza eta kanela, eta nahasi dena, ore modukoa eginda geratu arte. Anis ale apur batzuk ere gehitu izan dizkiot nik. Baina hau aukerakoa da, noski.

Erretilu batean jarri laberako papera, eta goilare batekin ore zatiak hartuta, eman gaileten forma. Nik molde biribil txiki batekin egiten ditut.
Eduki labean 20 minutuz, 180 gradutan.

Atera, eta kanela gustukoa baduzue, gehitu kanela apur bat gainetik.

Emaitza, goiko argazkian duzuena: azukrerik eta irinik gabeko olo gaileta gozoak.

On egin!

· Jatorrizko errezeta, hemen (gazteleraz, PDFan):
Galletas de avena (Nishime)





Glutenik gabeko etxeko kroketak

8 02 2017

Glutenik gabeko elikaduraren eta sukaldaritzaren baitan, azkenaldian liluratuta naukaten etxeko kroketak dira honakoak. Artatxikiarekin eta arto-irinarekin egiten ditut nik. Hemen osagaiak eta errezeta.

gluten-gabeko-kroketak
[ Artatxikia eta arto-irina erabilita etxean egindako kroketak.
Argazkia: 2017-02-07].

OSAGAIAK:
· Artatxikia (ES: mijo. ENG: millet. LAT: miliaceum).
· Arto-irina.
· Ura.
· Porru bat.
· Gurin bejetala (50 gramo inguru).
+ Ziazerbak (aukeran) edo urdaiazpikoa (aukeran).
+ Gatz apur bat (aukeran).

FRIJITZEKO:
· Esne bejetal apur bat (edo arrautza).
· Lio haziak.

Etxeko sukaldean normalean glutenik gabe aritzen naizenez, arto-irina erabilita egindako polenta errezetak probatzen hasi nintzen duela zenbait hilabete, eta ordura arte elikadurari eta sukaldaritzari buruzko zenbait forotan ezagutu nituen artatxikiarekin egindako errezetei polenta gehitu nien. Emaitza, artatxikiarekin eta arto-irinarekin egindako orea da. Hoztean loditu egiten da, eta kroketak egiteko primeran geratzen da.

Etxean honela egiten dut:

· Eltze txiki batean ura egosten jarri (lau bat edalontzi ur inguru).
· Egosten hasten denean, gehitu artatxikia (edalontzi bat).
· 15 minutu inguruz egosi artatxikia.
· Bitartean, zatitu porru bat, eta sueztitu edo potxatu olio apur batekin zartagin batean.
Tipula apur bat ere gehitu dakioke nahi izanez gero.
· Gehitu potxatutako porrua artatxikiari, eta gehitu nahi dena (urdaiazpiko kroketak nahi izanez gero, urdaiazpiko zatiak, edo barazki kroketak nahi izanez gero, ziazerbak, garbituta eta moztuta).
· Gehitu gurina.
· Amaitzeko, bota pixkanaka arto-irina, loditzen joan arte, eta etengabe nahasi irabiatzeko haga edo barilla batekin, beti ere su txikian. Minutu pare bat nahikoa dira.
· Zabaldu orea ontzi zabal batean, eta utzi hozten.
· Hoztean, zatitu orea kroketak egiteko moduan.

Frijitzeko:
· Arroz esnetan busti moztutako zatiak, eta irineztatu glutenik gabeko gustuko irinarekin*.
Nik arroz-esnea erabiltzen dut. Baina izan daiteke olo-esnea edo soia-esnea ere. Nahi duenak, irabiatutako arrautza ere erabil dezake.
· Olio berotan frijitu.

* Hasiera batean garbantzu-irina edo arroz-irina erabiltzen nuen, baina frijitu ondoren testura gogorregia geratzen zela iruditzen zitzaidan. Irin ezberdinekin probatu ondoren, lio haziekin irineztatuak dira bereziki gustatzen zaizkidanak. Irina, glutenik gabeko ogia egiteko sarrera honetan azaldu nuen bezala, kafe aleak ehotzeko molinillo edo ehogailu txiki batekin egin ohi dut etxean. Kasu honetan, lio haziak ehogailuan sartuta.

On egin!

 





Glutenik gabeko etxeko ogia

17 01 2017

photo-15-1-17-18-03-59
[ Glutenik gabeko gaRi* ogia, etxean egindakoa ].

Sarrera

Bi urte bete baino lehen alabari zeliakia diagnostikatu ziotenetik, glutenik gabeko elikadura eta elikagaiak ohikoak dira etxean.
Alabaren arratsalderoko ogitartekoa, esaterako, izoztuta saltzen duten glutenik gabeko ogi komertziala izaten da normalean, tostadoratik pasatuta. Kraskaria eta samurra geratzen da, eta gustura jaten du alabak.
baguetina-bolsa-h

Pan sin gluten liburua irakurri nuenetik, ordea, kezkatuta hasi nintzen sartzen barra erdia tostadorara.

Laburtuz: glutenik gabeko ogi komertzial ia guztiek, fekula eta almidoi gehiegi dute, samur eta kraskari geratu ahal izateko, eta benetako elikagai oso gutxi. Osagaiak begiratzea nahikoa da, zein hurrenkeran ageri diren ikusteko. Zerealen irina bigarren edo hirugarren mailakoa da, eta ageri denean ere ia inoiz ez da zereal integralena. Alegia: glutenik gabeko ogi komertzialak, tostadoratik pasatu ondoren kraskariak eta samurrak diren arren, ez direla batere osasuntsuak egunero janez gero, eta hobe dela saihestea.

Bide ia bakarra, etxean bertan ogia egiten ahalegintzea da, glutenik gabeko zerealekin, eta ahal bada glutenik gabeko zereal integralekin.

Lehen urratsa kafea ehotzeko ehogailu edo molinilloa erostea izan zen.
Erabaki ederra, egia esan. Erosi nuenetik, glutenik gabeko irinik ez dut erosi kanpoan. Aldiz, inoiz baino irin gehiago erabiltzen dut sukaldean: arroz zuriaren zein integralaren irina, gari sarrazenoaren irina, lio haziena, garbantzuena, soia aleena, eta abar. Etxean ohikoak ditudan zereal eta laboreak, ehogailutik pasatu, eta irin bihurtuta geratzen dira.

Orantza edo ama orea egiten ikastea izan zen bigarren urratsa.
Eta horrekin hasita, glutenik gabeko errezetak probatuz, ahalegin bakoitzean ikasiz eta erortzean berriro jaikiz, labean ogia egiten ahalegintzea.

Etsi, eta hirugarren urratsak mundu berria zabaldu zidan arte: okiolak, panifikadorak edota bakmeisterrak direlakoak. Glutenik gabeko elikadurari buruzko bateko eta besteko foroetan begiratu eta hautatu ondoren, Unold Backmeister 68110 laguna heldu zen etxeko sukaldera, eta harreman ederra dugu ordudanik.

Alabaren arratsaldeko ogitartekoaren ordezko osasuntsuagoa izango litzatekeena sortzeko errezetak eta gainerakoak bilatzen hasita, Pan gin gluten liburua bihurtu zitzaidan korana, eta han aurkitutako errezetetako baten aldaerak liluratuta nauka azken hilabeteotan, Unold Backmeister okiolan egiten dudan ogia nire gosarian ohikoa bihurtzeraino.

Honakoa da prozesua, osagai guztiekin.

GLUTENIK GABEKO gaRi OGIA:

1. Egosi kinoa apur bat.

2. Ur epela: 460 ml.

Kinoa egosteko erabilitako ura ere erabil daiteke, epelduta.

3. Egin polisha:

· Bete edalontzi erdia ur epelarekin (460 ml. horietatik).
· Bota glutenik gabeko legamia lehorra (7 gr.).
· Eztia edo azukre integrala koilarakada txiki bat.
· Nahastu dena, aparra atera arte, eta utzi igo dadin.

4. Hartu gurin zati oso txiki bat, eta okiolaren marmitan ongi igurtzi amasadoraren oinarria. Jarri amasadora, gurinarekin igurtzi ondoren.

5. Bota ur epela.

6. Gehitu glutenik gabeko irin nahasketa: 400 gr.

Komertziala izan daiteke, erositakoa.
Baina hobea da etxean egindako nahasketa, eta erraz ehotzen da irina, etxean dituzun zerealak ehogailuan edo molinilloan sartuta.

Etxean egindakoa bada, hauek dira kopuruak:

· Arroz zuriaren irina: 200 gr.
· Arroz integralaren irina: 70 gr.
· Patata fekula (maizena): 100 gr.

7. Gari sarrazenoaren edota artatxikiaren irina: 50 gr.

8. Garbantzoen edota soia aleen irina: 50 gr.

9. Psyllium husk: 20 gr. (koilarakada handi bat).

Psylliuma zer den, eta glutenik gabeko ogietan zer-nolako funtzioa betetzen duen, Cocina fácil sin gluten blogean irakur dezakezue, sarrera honetan: El psyllium en los panes sin gluten.

10. Lio haziak ehotuta: 80 gr. inguru.

Psylliumak eta lio haziek, elkarrekin oreari nahastuta, glutenak oreari ematen dion elastikotasunaren antzekoa lortzen dute nolabait.

11. Gatza: koilarakada txiki bat.

12. Bikarbonato sodikoa: koilarakada txiki bat.

13. Limoi zukua edota sagar ozpina: koilarakada bat.

14. Oliba olioa: 40 gr.

15. Eztia edo azukre integrala: koilarakada txiki bat.

16. Gehitu nahi diren osagaiak. Esaterako: eguzkilore edo kalabaza haziak (pipak).
Hasieran egositako kinoa ere orain gehitu daiteke: hiruzpalau goilarakada.

17. Gehitu etxean egindako orantza (ama orea) apur bat.

18. Gehitu hasieran egindako polisha (legamia, eztia edo azukrea eta ur epela).

19. Okiolan hautatu dagokion programa.
Etxekoa Unold Backmeister 68110 da.
· Vollkorn programa (3) hautatu behar da, ogi integralei dagokiena.
· Kruste (tostatze maila): Hell (argia), Mittel (ertaina), eta Dunke (iluna). Dunke hautatu ohi dut.
· Stufe: I (500 – 750 gr. arteko ogientzat) eta II (750 – 1.000 gr. arteko ogientzat). Stufe II, beraz.

20. Hiru ordu eta 40 minutu pasatzean ogia eginda dago, ogiolak piii egitean. Baina beste ordubetez bero mantentzen du nahi izanez gero. Bertan utziz gero, gehiago egiten da ogia, eta tostatzeko egoki geratzen da.

photo-15-1-17-18-01-17
Inork galdetu aurretik, erantzuna:
bai, alabari gustatzen zaio. Gustura jaten du.

# Oinarria: Pan sin gluten.
Marc Alier & Maria Jose Casañ, 2016.

51ehlslaxl

# Bibliografia:
· Davis, William: Sin trigo, gracias (Aguilar, 2014).
· Alier, M. & Casañ, M.J.: Pan sin gluten (2016).

Honaino iritsi bazara, gaia zure interesekoa izango delakoan nago. Beraz, merezi duzu oparia: azken liburu honen estekan klik eginez gero, liburua zuretzat, ePub formatuan.
On egin!





Ikusten ikasiz hobetzen da bista

10 01 2014

Herenegun, sare sozial batean Amaia Artze reiki maisuaren mezu hau ikusi nuen.

Begi Yoga

Ez nuen inoiz entzun edo irakurri ezer begi yogari buruz, eta Osaba Googlei galdetu nion. Erantzunetan eskaini zizkidan esteka guztien lehenengoetakoak gainbegiratu orduko harritu ninduen gaiak. Azken batean, honakoa da laburpena: hezurren bat hausten dugunean, makuluak jartzen dizkigute, eta ondoren errehabilitazioa dator, giharrak indartzeko eta hankak, besoak edo dena delakoa bere onera etortzeko. Begia ere giharra da, baina ahultzen denean ez digute irakatsi errehabilitazioa egiten. Makuluekin ibiltzera behartzen gaituzte bizitza osorako: betaurrekoak edo lentillak. Begia indartzeko eta osatzeko ariketak eginez gero, ordea, bista berreskuratu daiteke, makuluen beharrik gabe: betaurrekorik edo lentillarik behar izan gabe.

gari-betaurrekoak

Sasoi batean (10-12 urte nituenean) betaurrekoak izan nituen arren, ez dut azken 25 bat urteotan betaurrekoen beharrik izan, baina gaiak interesa sortu eta atzo Zarauzko Iogan Zentrora joan nintzen, begi yogari buruzko informazio hitzaldira.

Bates metodoari esker betaurrekoak kentzea lortu zuen Yolandak kontatu zizkigun gai honi buruzkoak, bertaratutako denak entzundakoekin erabat harrituz. Laburtuz:
· Ikusten ikasi behar dugu, bista galtzen ez joateko edo galdutako bista berreskuratzeko.
· Begia gai da horretarako. Makuluak (betaurrekoak zein lentillak), gainera, kaltegarriak dira begia osatu dadin. Makulurik gabe osatu behar da begia, ariketekin, begiarentzako errehabilitazioarekin.
· Begia gorputzaren beste organu bat gehiago da eta, beraz, gure egoera fisikoarekin oso lotuta dago bistaren kalitatea: orekak, lasaitasunak eta elikadura egokiak bista askoz hobea edukitzea dakar.

Solasaldiaren amaieran, kristalik gabeko betaurreko beltz eta zulodunak erakutsi zizkigun: estenoak, edo betaurreko  retikularrak, edo rasterbrille, edo pinhole… hainbat izen dituzte, hizkuntzaren arabera. Denok probatu genituen. Eta normalean betaurrekoak erabiltzen dituzten eta han zeuden herritarrek ezin zuten sinetsi: primeran ikusten zuten betaurreko berezi haiek jantzita. Ez zuten graduaziorik. Kristalik gabeko betaurreko zulodunak ziren, besterik gabe.

Bista arazoak izan arren, gure begiek berez betaurreko edo lentillarik gabe ere egoki enfokatzeko eta egoki ikusteko gaitasuna dutela erakusteko adibide bat besterik ez zen izan. Ikusten ikastea eta begia errehabilitatzea da gakoa, ez besterik. Ikasi egiten da. Europan, hainbat herrialdetan ari dira William H. Batez oftalmologoaren metodoari esker ikusteko eskolak sortzen eta milaka herritarrei bista ona berreskuratzeko aukera ematen, eta hori gurean ere ezagutaraztea eta jendeari ikusten erakustea da asmoa.

Zarauzko kasuan, ordu eta erdiko 12 saio izango dira. Astean behin, ostegunero, 20:15etik 21:45era, Iogan zentroan.
Hiru hilabete iraungo du, beraz, ikusten ikasteko ikastaroak, eta hilero 50 euro ordaindu behar da. Normalean, bista nabarmen berreskuratzen dute parte hartzaileek, eta kasu askotan makuluen inolako beharrik gabe amaitzen da errehabilitazioa.

Pertsonalki, ez dut inolako harremanik ez Iogan zentroarekin, ez Yolandarekin.
Baina gaiak zeharo harritu nau.
Atzo, informazio aurkezpenetik etxera heldu eta sarean aritu nintzen gai honi buruzkoak irakurtzen, eta Andrea Buch kataluniarraren webgune honekin egin nuen topo (gazteleraz): medotobates.es

metodo bates

Bertan, primeran azaltzen dira atzo Yolandak laburtu zizkigunak.

Gaiari buruz gehiago jakin nahi izanez gero, hemen artikulu bat, PDFan:
[irudiaren gainean klik eginda jaitsi daiteke PDFa]
andrea2

Inolako zalantzarik gabe, ondo ikusteko arazoak dituzten eta betaurrekoak edo lentillak erabiltzen dituzten lagun guztiei erabat gomendatzen diet gaiari buruzkoak irakurtzeko eta, ahal izanez gero, metodo honetan oinarritutako ikastaroen berri izateko.

Gai honi buruzko informazio osagarria eta kanpo loturak:
· Mejora tu visión de forma natural: medotobates.es
· Bathes Metod and pinhole glasses.